வித்தியா படுகொலை வழக்கு: மேன்முறையீட்டு விசாரணை ஒத்திவைப்பு

2015ஆம் ஆண்டு பெரும் சர்ச்சையை ஏற்படுத்திய வித்தியா படுகொலை தொடர்பில் யாழ்.மேல் நீதிமன்றினால் மரண தண்டனை விதிக்கப்பட்டுள்ள ஆறு பிரதிவாதிகளின் மேன்முறையீட்டு விசாரணை ஒத்திவைக்கப்பட்டுள்ளது.

இந்த மேன்முறையீட்டு மனுக்கள் பிரிதி பத்மன் சூரசேன, யசந்த கோதாகொட, ஏ.எச்.எம்.டி.நவாஸ், ஷிரான் குணரத்ன மற்றும் பிரியந்த பெர்னாண்டோ ஆகிய 5 பேர் கொண்ட உயர் நீதிமன்ற அமர்வு முன்னிலையில் நேற்று விசாரணைக்கு அழைக்கப்பட்டது.

இதன்போது குறித்த வழக்கில் தொடர்புடைய குற்றவாளிகளில் ஒருவர் உயிரிழந்துவிட்டதாக சிறைச்சாலை அதிகாரிகள் நீதிமன்றத்தில் தெரிவித்தனர்.

பிரதிவாதி சார்பில் முன்னிலையான சட்டத்தரணி ஆறுமுகம் ரகுபதி, இந்த வழக்கு தொடர்பான மொழிபெயர்க்கப்பட்ட ஆவணங்களை பெற்றுக் கொள்வதில் தாமதம் ஏற்பட்டதன் காரணமாக, இந்த பிரதிவாதிகள் எட்டு வருடங்களுக்கும் மேலாக சிறைச்சாலையில் உள்ளதாக நீதிமன்றத்தில் தெரிவித்தார்.

இந்நிலையில், வழக்கு தொடர்பான மொழிபெயர்க்கப்பட்ட ஆவணங்களை உடனடியாக வழங்க நடவடிக்கை எடுக்கப்படும் என பிரதி மன்றாடியார் நாயகம் ஆயிஷா ஜினசேன நீதிமன்றத்தில் தெரிவித்தார்.

இந்த பிரதிவாதிகள் கொலை, சதி மற்றும் சட்டவிரோத குடியேற்றம் ஆகிய குற்றங்களில் குற்றவாளிகள் என நிரூபிக்கப்பட்டுள்ளதாகவும், யாழ்.மேல் நீதிமன்றில் நடைபெற்ற வழக்கு விசாரணையில் பிரதிவாதிகள் இருவர் விடுதலை செய்யப்பட்டதாகவும் சொலிசிட்டர் ஜெனரல் தெரிவித்தார்.

சமர்ப்பிக்கப்பட்ட உண்மைகளை பரிசீலித்த ஐந்து பேர் கொண்ட உச்ச நீதிமன்ற அமர்வு, இந்த வழக்கு தொடர்பான மொழிபெயர்க்கப்பட்ட ஆவணங்களை உடனடியாக வழங்க நடவடிக்கை எடுக்குமாறு அறிவித்தது.

அதன்பிறகு, இந்த மேல்முறையீட்டு மனு மீதான விசாரணையை ஜனவரி 20ஆம் திகதிக்கு மீண்டும் ஒத்திவைத்து அமர்வு உத்தரவிட்டுள்ளது.