தேர்தல் வன்முறைகள் தொடர்பில் விசேட செயற்பாட்டு மையம்: தேர்தல்கள் ஆணைக்குழுவின் தலைவர் தகவல்
தேர்தல் தொடர்பான வன்முறைகள் மற்றும் தேர்தல் சட்ட மீறல்களை கண்காணிப்பதற்காக சிரேஷ்ட பிரதிப் பொலிஸ் மா அதிபர் (SDIG) கீழ் செயற்பாட்டு மையம் ஒன்றை நிறுவுவதற்கு நடவடிக்கை எடுக்கப்பட்டுள்ளது.
இந்த நடவடிக்கை ஜனாதிபதித் தேர்தலை நடத்துவதற்கான ஆயத்தங்களில் முதன்மையானதாக இருக்கும் என தேர்தல்கள் ஆணைக்குழுவின் தலைவர் ஆர்.எம்.ஏ.எல்.ரத்நாயக்க தெரிவித்துள்ளார்.
முதலாவது மையம் அடுத்த வாரத்திற்குள் கொழும்பில் அமைக்கப்படும் எனவும் அதனைத் தொடர்ந்து அனைத்து மாவட்டங்களிலும் தேர்தல் வன்முறைகள் மற்றும் தேர்தல் சட்ட மீறல்கள் தொடர்பான முறைப்பாடுகளை தெரிவிப்பதற்காக மையங்கள் அமைக்கப்படும் எனவும் அவர் தெரிவித்துள்ளார்.
தேர்தல் தொடர்பான நடவடிக்கைகளை மேற்பார்வையிட சிரேஷ்ட பிரதிப் பொலிஸ் மா அதிபர் (தேர்தல்) K.V.D.A.J கரவிட்ட ஏற்கனவே நியமிக்கப்பட்டுள்ளார்.
மாவட்டங்களில் ஒருங்கிணைப்புக்கு மூத்த பொலிஸ் கண்காணிப்பாளர் (SSP) நியமிக்கப்படுவார்.
இதனைத் தொடர்ந்து வாட்ஸ்அப், தொலைநகல் உள்ளிட்ட தொலைபேசி எண்கள் அறிவிப்படும், இது மக்கள் புகார் மற்றும் தகவல்களை வழங்க உதவும் என அவர் சுட்டிக்காட்டியுள்ளார்.
இதேவேளை, வேட்புமனுத் தினத்திற்கான பாதுகாப்பு ஏற்பாடுகள் அடுத்த முன்னுரிமையாக இருக்கும் என தேர்தல்கள் ஆணைக்குழுவின் தலைவர் சுட்டிக்காட்டியுள்ளார்.
இந்த விடயம் தொடர்பில் சிரேஷ்ட பிரதிப் பொலிஸ் மா அதிபர் SDIG (தேர்தல்கள்) மற்றும் மூன்று மூத்த காவல்துறை கண்காணிப்பாளர்களுடன் (SSP) கலந்துரையாடல்கள் நடத்தப்பட்டுள்ளன.
மேலும் தேவையான பாதுகாப்பு ஏற்பாடுகளை செய்ய அறிவுறுத்தல்கள் வெளியிடப்பட்டுள்ளதாக அவர் குறிப்பிட்டுள்ளார்.
பொலிஸ் மா அதிபர் இல்லாததால் எந்த தடையும் இருக்காது என்று நம்புவதாகவும், எனவே வேட்புமனு தாக்கல் செய்வதற்கான ஏற்பாடுகளை செய்ய முடியும் என்றும் அவர் கூறியுள்ளார்.
தேர்தல் அறிவிக்கப்பட்ட பிறகு, பொலிஸாருக்கு உத்தரவு பிறப்பிக்க அரசியலமைப்பின் கீழ் தேர்தல்கள் ஆணையத்துக்கு அதிகாரம் உள்ளது.
இதற்கிடையில், தபால் மூல வாக்களிப்புக்கான ஏற்பாடுகள் நடைபெற்று வருகின்றன, மேலும் வாக்குச் சீட்டு அச்சடிக்கும் பணியும் தொடங்கியுள்ளது.
வாக்குச்சாவடி மையங்கள் மற்றும் வாக்குப்பெட்டிகள் தயார் செய்யும் பணிகள் அடுத்த வாரம் மேற்கொள்ளப்படும் என்றார்.
ஜனாதிபதித் தேர்தலுக்கான வேட்புமனுக்கள் ராஜகிரியவில் உள்ள தேர்தல்கள் ஆணைக்குழுவின் தலைமை அலுவலகத்தில் ஆகஸ்ட் 15ஆம் திகதி பெறப்படும்.
